BALIMAU

BALIMAU

'Nku, puaso lah dakek, lah elok pulo kito siap-siap pai balimau go 'Nku?

Ndak do urang pai balimau kini lai do. Kalau dulu, iyo bana sumarak. Tiok-tiok hari ka puaso, rami urang pai ka tampek2 pemandian. Kalau kito di Banuhampu ko, biaso no balimau ka sungai tanang. Babungkuih nasi jo daun, sambanyo talua abuih tambah lado jo ikan asin. Kalau lah panek maambua dan baranang-ranang, tu makan lih. Sudah tu, pulang.

Takana di awak Nku, balimau manjalang puaso ko ndak syari'at agamo ko?

Manuruik 'Nku, indak. Hanyo budaya masyarakat Islam di tempat2 tertentu sajo. Di Jawa kabanyo ndak ado urang balimau ko do, apo lagi di Mesir.

Kalau ado di Mesir, tantu di sungai nil urang balimau tu yo 'Nku?

Tantu iyo. Kalau indak, mungkin di Lauik Merah, tampaik fir'un ditenggelamkan Allah pado maso dahulu kalo.

Jadi, ndak syari'at agamo do yo Nku?

Indak. Karano, kalau syari'at ugamo, pasti seluruh umat Islam di dunia menjelang puaso ko balimau seluruh no. Kemudian, kalau syari'at, pasti balimau itu dari dulu sampai kini dikarajoan oleh umat Islam sacaro taruih manaruih. Dan nan paliang pokok, kalau syari'at, tantu ado dalil ayat dan hadis sahih nan manarangkan nyo.

Nku, misal no awak ingin juo pai balimau manjalang puaso ko, lai buliah Nku?

Buliah. Tapi, tolong dijago syari'at agamo kito. Mandi ndak buliah bacampua laki-laki jo padusi. Aurat harus ditutuik. Dan ingek aia bakeh mandi ijan diminum. Hahaha.

Hahaha, kalau diminum sakik wak yo Nku.
Nku go ado-ado sajo. Aia daki ka diminum pulo. Yolah 'Nku. Tarimo kasih banyak ateh keterangan 'Nku.

Samo2. 'Nku suko pulo mah ditanyo2 sarupo iko. Takana di 'Nku palajaran sangkek di Parabek baliak.
O yo, bisuak kalau ndak jadi pai balimau, pai makan lamak se wak dih. Bia Nku nan mambaia kan.

Iyo bana Nku?
Kalau baitu, bialah wak ndak jadi balimau Nku. Pai makan jo Nku sajo lah wak.

Haha, tu iyo cadiak kamanakan Nku tuh.
Kalau pai balimau, abih pitih. Tapi, kalau pai makan jo Nku, pitih ndak kalua paruik kanyang pulo.

SELAMAT MEMASUKI BULAN SUCI RAMADHAN 1439 H

Wassalam
Angku Rumah Panjang.